امریکی صدر ٹرمپ نے وائٹ ہاؤس میں ایک تقریب سے خطاب کرتے ہوئے وینزویلا کے خلاف جلد زمینی کاروائی کرنے کا اعلان کردیا ہے۔ اس موقع پر اس کا کہنا تھا کہ وہ مختلف وجوہات کی بنیاد پر وینزویلا سے خوش نہیں ہیں۔
انہوں نے کہا کہ منشیات اسمگلرز کے خلاف اعلان جنگ کی ضرورت نہیں، جو لوگ امریکہ منشیات لا رہے ہیں، ہم انہیں مار ڈالیں گے۔
امریکی صدر نے بتایا کہ وہ سمندر کے راستے امریکہ میں منشیات کا داخلہ روکنے کے لیے اقدامات کر رہے ہیں، تاہم انہوں نے وینزویلا کے قریب بی ون بمبار طیاروں سے متعلق رپورٹس کو غلط قرار دیا۔
ٹرمپ نے دعویٰ کیا کہ کولمبیا منشیات کا گڑھ بن چکا ہے اور میکسیکو کو ڈرگ کارٹیل چلا رہے ہیں۔
امریکی صدر نے الزام لگایا کہ چین فینٹانائل کی اسمگلنگ کے لیے وینزویلا کو استعمال کر رہا ہے، ساتھ ہی ٹرمپ نے اس خیال کا اظہار بھی کیا کہ چینی صدر کے ساتھ ملاقات کے نتائج مثبت ہوں گے۔
روسی تیل کمپنیوں پر پابندیوں سے متعلق سوال پر امریکی صدر نے کہا کہ روس کو 6 ماہ بعد پتا چلے گا کہ پابندیوں کے کیا نتائج نکلتے ہیں۔
ایک اور سوال پر ٹرمپ نے یقین ظاہر کیا کہ اسرائیل مغربی کنارے کے انضمام سے متعلق کوئی اقدام نہیں کرے گا
