حضرت آیت اللہ نوری ہمدانی نے ایک تحریر میں امام خمینیؒ کی برسی کی مناسبت سے ان کی شخصیت، دینی خدمات اور انقلابی بصیرت پر مفصل گفتگو کی ہے۔ ان کے اس تحریر کا خلاصہ درج ذیل ہے:
بسم الله الرحمن الرحیم. الحمدلله رب العالمین. والصلوة و السلام علی البشیر النذیر و السراج المنیر سیدنا و نبینا ابیالقاسم محمد و علی اهل بیت الطیبین الطاهرین المعصومین، سیما بقیة الله فی الارضین.
اختصار کے ساتھ کہنا چاہیے کہ امام عصر (عجل اللہ تعالیٰ فرجہ الشریف) کی غیبت صغریٰ کے بعد، غیبت کبریٰ کے دور میں امام خمینی (رضوان اللہ علیہ) جیسے نادر و نابغہ شخصیت دنیا میں ظاہر نہ ہوئی۔
یہ کہنا بجا ہوگا کہ جب صدر اسلام کا ناب اسلام، جو رسول اکرم (صلی اللہ علیہ وآلہ وسلم) کے ذریعے ایران پہنچا تھا، آہستہ آہستہ استکبار اور شیطانی طاقتوں کے ہاتھوں منظر سے ہٹا دیا گیا، تو یہ امام راحل ہی تھے جنہوں نے اس اصیل اسلام کو نہ فقط ایران میں بلکہ پوری دنیا میں دوبارہ زندہ کیا۔
لہٰذا، ہم جتنا بھی امام (رضوان اللہ علیہ) کے بارے میں کہیں یا لکھیں، ہم یہ محسوس کرتے ہیں کہ ان کی شخصیت کی گہرائی، وسعت اور مختلف پہلوؤں کو بیان کرنے سے قاصر ہیں، کیونکہ وہ ہر لحاظ سے مہارت اور تخصص کے حامل تھے۔ میں نے نہ صرف ان کے آثار کا مطالعہ کیا ہے بلکہ ان کے تمام دروس میں حاضر بھی رہا ہوں۔
مجھے شروع سے یہ عادت تھی کہ جس درس میں بھی شرکت کرتا، اس کے مطالب کو قلم بند کرتا۔ آیت اللہ العظمیٰ بروجردی (رحمۃ اللہ علیہ) کے دروس — جن کا آغاز ان کے قم تشریف لانے سے ہوا، حالانکہ میں ان سے پہلے قم آ چکا تھا — تا آخر، خواہ وہ فقہ ہو یا اصول، سب کچھ لکھا۔
پھر بارہ سال تک آیت اللہ سید محمد محقق داماد (رحمۃ اللہ علیہ) کے درس میں شریک رہا اور ان کے فقہ و اصول کے مباحث بھی تحریر کیے۔ اس کے بعد امام راحل (رضوان اللہ علیہ) کے فقہ و اصول کے دروس بھی قلم بند کیے۔ مزید برآں، “صحیفہ نور” (یا “صحیفہ امام”) کو جو بائیس جلدوں پر مشتمل ہے، میں نے کئی بار آغاز سے اختتام تک مطالعہ کیا ہے، اور اسی طرح “دفتر تبیان” کی پچاس جلدوں پر مشتمل مجموعے کو بھی، جو موضوعاتی طور پر مرتب کیا گیا ہے — مثلاً ایک جلد حوزہ علمیہ و روحانیت کے لیے، ایک بسیج کے لیے، ایک سپاہ کے لیے، اور ایک استکبار کے لیے مختص ہے — مکمل طور پر پڑھا ہے۔
لہٰذا، امام کے کتب و مطالب سے گہری آشنائی رکھتا ہوں اور ہمیشہ ان کے محضر میں رہا ہوں۔ اسی طرح، میں ان کی طرف سے نمائندہ کی حیثیت سے دنیا کے مختلف خطوں — مشرق سے مغرب تک — سفر کرتا رہا؛ دو سال تک یورپ میں ان کے نمائندے کے طور پر مامور رہا، اور اس کے بعد فلپائن، ہندوستان، پاکستان، بنگلادیش، تھائی لینڈ وغیرہ جیسے ممالک میں بھیجا گیا۔ اس طرح، میری زندگی کا ایک حصہ، خداوند متعال کے فضل سے، امام کے کلمات و افکار کی ترویج میں گزرا؛ ایک ایسا دور جسے میں اپنی زندگی کے روشن ترین اور قیمتی ترین ادوار میں شمار کرتا ہوں، الحمد للہ تعالیٰ۔
شام کے سفر کے دوران، وہاں کی بڑی لائبریریوں کے معائنہ کے وقت، مجھے ایک کتاب ملی جس کا عنوان “ثورة الفقیه و دولته” تھا، جو اب بھی میرے پاس موجود ہے۔ اس کتاب میں دنیا کے پچاس معروف مفکرین نے، ہر ایک نے اپنی مخصوص نگاہ سے، امام کے قیام و انقلاب کا تجزیہ کیا ہے۔ یہ کتاب نہایت قیمتی ہے: “ثورة الفقیه و دولته”۔
غیبت کبریٰ کے دور میں، وسعت، نتائج اور اثر کے اعتبار سے ایسا کوئی قیام وقوع پذیر نہیں ہوا۔
امام (رضوان اللہ علیہ) بارہا تاکید فرمایا کرتے تھے کہ “یہ قیام اور انقلاب جو ہم نے برپا کیا ہے، بجھنے والا اور ختم ہونے والا نہیں، بلکہ امام عصر (عجل اللہ تعالیٰ فرجہ الشریف) کے ظہور کا مقدمہ ہے۔” ان کا یہ جملہ بار بار دہرانا، ان کے قلبی یقین کو ظاہر کرتا ہے، اور وہ ایمان، عقیدہ اور بلند معنویت کے ساتھ فرمایا کرتے تھے:
“خمینی، تم جہاں بھی ہو، تمہارے ساتھ ہے؛ یہ پرچم زمین پر نہیں گرے گا اور یہ چراغ بجھے گا نہیں۔
