اقوام متحدہ میں ایران کے مستقل مندوب امیرسعید ایروانی نے سلامتی کونسل کے نام اپنے باضابطہ مراسلے میں لکھا ہے کہ امریکہ نے ایران پر حملے میں مرکزی کردار ادا کرنے کا خود اعتراف کیا ہے اور اب اسلامی جمہوریہ ایران کو پورا حق حاصل ہے کہ تمام قانونی وسائل کے ذریعے اس جارحیت کے ذمہ داروں کو جوابدہ اور انہیں تمام نقصانات کا ازالہ کرنے پر مجبور کرے۔
امیرسعید ایروانی نے اس خط میں لکھا ہے کہ ایران کے اقتدار اعلی اور ارضی سالمیت پر دراندازی کے امریکہ کے اعتراف کے بعد، کہ جو اقوام متحدہ کے منشور کی شق نمبر 4-2 کی کھلی خلاف ورزی ہے، تہران اپنے تمام قانونی حقوق اور وسائل کو بروئے کار لاکر واشنگٹن کو جوابدہ کرے گا۔
انہوں نے لکھا کہ صیہونی حکومت کے حملوں میں جس میں امریکہ نے مرکزی کردار ادا کیا ہے، عام شہری، ان کے اثاثے اور شہری تنصیبات کو جان بوجھ کر نشانہ بنایا گيا، لہذا عالمی قوانین کے مطابق، امریکہ کی ذمہ داری ہے کہ ایران اور اس کے شہریوں کو پہنچنے والے تمام مادی اور نفسیاتی نقصانات کا ازالہ کرے۔
اقوام متحدہ میں ایران کے مستقل مندوب نے کہا کہ امریکی حکام نے خود ان جرائم کا اعتراف کیا ہے جو کہ “جارحیت کے جرم” اور “بین الاقوامی امن پسندانہ قوانین کی خلاف ورزی” کے تحت انہیں فوجداری قوانین اور سزا کا سامنا کرنا پڑے گا
