معروف اہل سنت مبلغ مولوی طارق جمیل نے لاہور میں جامعہ اشرفیہ کے دورے کے دوران جامعہ کے مہتمم حافظ فضل الرحیم کی عیادت کرتے ہوئے کہا کہ ان کی تمام زندگی اسلام کی اشاعت اور دین کی خدمت میں گزری ان کی دینی و ملی خدمات قابل تعریف اور لائق تحسین ہیں۔
اس موقع پر مولوی طارق جمیل نے جامع مسجد حسن جامعہ اشرفیہ لاہور میں طلباء سے خطاب کرتے ہوئے کہا کہ دینی مدارس قرآن و حدیث کی اشاعت اور نسل نو کے ایمان کی حفاظت کا بہترین ذریعہ ہیں، جہاں انتہائی پاکیزہ اور نورانی ماحول میں طلباء علم دین حاصل کرتے ہیں۔
انہوں نے مزید کہا کہ برصغیر پاک وہند جیسے دینی مدارس اور طلباء پوری دنیا میں کہیں نہیں دیکھے، ان مدارس میں تعلیم حاصل کرنے والے طلباء اور اساتذہ کرام علم دین سیکھنے، سکھانے اور اس کی اشاعت میں اپنی زندگیاں خرچ کر دیتے ہیں۔
مزید کہا کہ آج اس بات کی شدید ضرورت ہے کہ قرآن مجید کے ساتھ مسلمان اپنا اور نسل نو کے تعلق کو مضبوط کریں۔ انہوں نے کہا کہ قرآن مجید اور اس کے احکامات سے دوری کی وجہ سے آج پوری دنیا میں مسلمان مصائب و مشکلات کا شکار ہیں۔ انہوں نے طلبا کو ہدایت کی کہ وہ دینی تعلیم کے ساتھ دعوت و تبلیغ میں بھی وقت لگانے کا اہتمام کریں۔
آخر میں انہوں نے دینی مدارس کے تحفظ، غزہ، برما اور دیگر مظلوم مسلمانوں کی آزادی و نصرت اور ترقی و استحکام کیلیے خصوصی دعا کروائی
