برطانیہ کے دارالحکومت لندن میں ہزاروں افراد نے امریکہ اور اسرائیل کی جنگی پالیسیوں کے خلاف ایک بڑی احتجاجی ریلی نکالی اور ایران و فلسطین کے خلاف جاری کارروائیوں پر شدید احتجاج کیا۔
ذرائع کے مطابق لندن کے مختلف علاقوں سے آنے والے شہریوں نے شہر کی مرکزی سڑکوں پر جمع ہو کر امریکہ اور اسرائیل کی پالیسیوں کے خلاف نعرے لگائے اور جنگ کے پھیلاؤ پر شدید تشویش کا اظہار کیا۔
مظاہرین نے برطانوی حکومت کی جانب سے امریکہ اور اسرائیل کی حمایت پر بھی تنقید کرتے ہوئے کہا کہ لندن کو ان پالیسیوں کی پشت پناہی بند کرنی چاہیے جو مشرق وسطیٰ میں کشیدگی اور جنگ کو بڑھا رہی ہیں۔
شرکاء نے ایران کے خلاف حملوں کے فوری خاتمے پر زور دیا اور کہا کہ خطے میں کشیدگی میں اضافہ عالمی امن کے لیے خطرناک ثابت ہو سکتا ہے۔
مظاہرے میں شریک افراد نے بینرز اور پلے کارڈز اٹھا رکھے تھے جن پر جنگ کے خاتمے، فلسطینی عوام کے حقوق کے احترام اور مشرق وسطیٰ میں امن کے قیام کے مطالبات درج تھے۔
مظاہرین نے خبردار کیا کہ اگر عالمی طاقتیں اپنی جنگی پالیسیوں پر نظر ثانی نہ کریں تو اس کے اثرات صرف مشرق وسطیٰ تک محدود نہیں رہیں گے بلکہ پوری دنیا عدم استحکام کا شکار ہوسکتی ہے۔
