ماہ محرم کی عزاداری ایک عظیم نعمت ہے،سید حسن نصر اللہ

وفاق ٹائمز،حزب اللہِ لبنان کے سربراہ سید حسن نصر اللہ نے اپنے ایک بیان میں کہا ماہ محرم کی عزاداری ایک عظیم نعمت ہے اور اس پر خدا کا شکر ادا کرنا چاہئے، اور نواسہ رسول حضرت امام حسین علیہ السلام کے ایام سوگواری کی آمد پر تمام مسلمان عالم کی خدمت میں تسلیت و تعزیت پیش کی۔
انہوں نے محرم کی پہلی شب کی مناسبت سے اپنے خطاب میں مظلوم کربلا سید الشہدا امام حسین علیہ السلام کی عزاداری کو خدائے سبحان کی عظیم نعمتوں میں قرار دیا اور کہ اس نعمت پر شکر خدا لازمی ہے۔
حزب اللہِ لبنان کے سربراہ نے فرزند رسول کی عزاداری میں مصروف سبھی متوالوں سے اپیل کی کہ وہ کورونا وبا کی موجودہ صورتحال کے پیش نظر طبی اصولوں اور ایس او پیز کا خیال رکھیں اور اپنے درست رویے سے عزاداری کی نعمت اور اپنی صحت و سلامتی پر خدا کا شکر ادا کریں۔
خیال رہے کہ ایران و عراق اور پاکستان سمیت مختلف ممالک میں آج محرم الحرام کی آمد سے نئے ہجری قمری سال ۱۴۴۳ کا آغاز ہو گیا ہے۔ اسی مناسبت کے پیش نظر سبھی مقامات مقدسہ کے علاوہ شہروں، قریوں، گلی کوچوں مساجد اور امامباڑوں کو سیاہ پوش کر کے باضابطہ سید الشہدا کی عزاداری و سوگواری کا آغاز کر دیا گیا ہے۔
اس بار مسلسل دوسرے سال سوگواروں کو کورونا عالمی وبا کا سامنا ہے اور اسکی محدودیتوں کے ساتھ وہ عزاداری اور سوگواری میں مصروف ہیں۔ علمائے کرام اور مراجع عظام کے علاوہ ممالک کی وزارت صحت کے حکام نے بھی نواسہ رسول کے چاہنے والوں سے اپیل کی ہے کہ وہ کورونا پروٹوکول کا خیال رکھتے ہوئے مجالس عزا کا اہتمام کریں۔