وفاق ٹائمز، مجلس وحدت مسلمین پاکستان سندھ کے نائب صدر علامہ مختار احمد امامی نے کہا ہے کہ وحدت و اتحاد کی سب سے مضبوط رسی ربیع الاول کا مقدس مہینہ ہے، سرور کائنات حضرت محمد مصطفیٰ (ص) کا میلاد مناکر امت کے سب ہی فرقے محبت و اخوت کی لڑی میں پروئے جا سکتے ہیں، تمام عالم اسلام کو جشن عید میلاد النبی (ص) کی مبارکباد پیش کرتے ہیں، بارہ ربیع الاول تا سترہ ربیع الاول ایم ڈبلیو ایم پورے ملک میں ہفتہ وحدت کے طور پر منا رہی ہے۔ کراچی میں عید میلاد النبیؐ کے موقع پر لگائی سبیل میں خصوصی گفتگو کرتے ہوئے ایم ڈبلیو ایم رہنما نے کہا کہ کچھ شرپسند داخلی و خارجی قوتیں کبھی دوست اور کبھی دشمن کے روپ میں شیعہ سنی کو دو ایسے متحارب گروہوں میں تقسیم کرنا چاہتی ہیں جو نوے فیصد مشترکات پر باہم ہونے کی بجائے ان اختلافات کی زد میں ہوں جو دس فیصد سے بھی کم ہیں۔
ان کا مزید کہنا تھا کہ ہمیں اختلافات میں الجھنے کی بجائے بھائی چارہ قائم کرکے وطن عزیز کو ایک ایسی مثالی ریاست ثابت کرنا ہے جو ہر طرح کے تعصب اور تفریق سے پاک ہو، پاکستان کے ریاستی اداروں کی طرف سے ان عناصر کے خلاف موثر کاروائی ہونی چاہیئے جو ہم وطنوں میں نفرت کے بیج بورہے ہیں، دشمن کی سازشوں کا حصہ نہ بنا جائے بلکہ آپس کے اختلافات کو بھلا کر وحدت کو فروغ دیا جائے کیونکہ جب تک ہم اتحاد و امن کا دامن نہیں تھامیں گے تب تک دشمن ہم میں نفوذ کرتا جائے گا، لہٰذا ضروری ہے کہ تمام باہمی مسائل کو ختم کرکے سیرت النبی (ص) کو اپنایا جائے جو ہمیں بھائی چارے اور اتحاد و امن کا درس دیتی ہے۔
