1

علی گڑھ مسلم یونیورسٹی میں “علی (ع) ڈے” کا ۷۲ واں اجلاس منعقد

  • News cod : 59988
  • 04 فوریه 2025 - 19:21
علی گڑھ مسلم یونیورسٹی میں “علی (ع) ڈے” کا ۷۲ واں اجلاس منعقد
ہندوستان کے پہلے مسلم صدر ڈاکٹر ذاکر حسین کے قائم کردہ تاریخی "علی ع ڈے" کا ۷۲ واں اجلاس علی گڑھ مسلم یونیورسٹی میں علی سوسائٹی کے زیر اہتمام منعقد ہوا۔ اس تقریب میں معزز دانشوران، مہمانان گرامی اور طلبہ و طالبات نے شرکت کی۔

وفاق ٹائمز، ہندوستان کے پہلے مسلم صدر ڈاکٹر ذاکر حسین کے قائم کردہ تاریخی “علی ع ڈے” کا ۷۲ واں اجلاس علی گڑھ مسلم یونیورسٹی میں علی سوسائٹی کے زیر اہتمام منعقد ہوا۔ اس تقریب میں معزز دانشوران، مہمانان گرامی اور طلبہ و طالبات نے شرکت کی۔ تقریب میں امام علی (علیہ السلام) کی حکمت، قیادت اور تعلیمات پر گفتگو کی گئی۔

اس اجلاس میں جامعہ کے طلاب کے درمیان مقالہ نویسی، مضمون نویسی اور پوسٹر نویسی کے مقابلے منعقد ہوئے، جن میں ممتاز کارکردگی دکھانے والوں کو انعامات سے نوازا گیا۔

پروگرام کا آغاز تلاوت قرآن پاک اور نعت شریف سے ہوا، جس کے بعد علی سوسائٹی کے موجودہ سرپرست مولانا ڈاکٹر سید محمد اصغر نے خطبۂ استقبالیہ پیش کیا۔

علی گڑھ مسلم یونیورسٹی کی وائس چانسلر پروفیسر نعیمہ خاتون نے اپنے خطاب میں طلبہ کو نصیحت کی کہ وہ امام علی (علیہ السلام) کی تعلیمات سے حکمت اور تحریک حاصل کریں اور ان کی تعلیمات کو اپنی زندگی کا حصہ بنائیں۔

ایرانی سفیر برائے ہندوستان، ڈاکٹر ایرج الٰہی، نے بطور مہمان خصوصی شرکت کی۔ انہوں نے علی گڑھ مسلم یونیورسٹی اور امام علی (علیہ السلام) کے درمیان تاریخی اور ثقافتی روابط پر روشنی ڈالی اور ہندوستان و ایران کے دیرینہ تعلقات کا ذکر کیا۔

رکن پارلیمنٹ جناب محمد حنیفہ نے بطور اعزازی مہمان امام علی (علیہ السلام) کی قیادت اور ان کی حیات طیبہ پر روشنی ڈالی۔

استاد جامعۃ الامام امیر المومنین (ع) نجفی ہاؤس حجت الاسلام والمسلمین مولانا سید محمد ذکی حسن نے “امام علی (علیہ السلام) کی سیرت میں دینی و سیاسی اقلیت کا خیال” کے موضوع پر تقریر کی۔ انہوں نے امام علی (علیہ السلام) کے دور حکومت میں ہر قوم و قبیلہ کے افراد کے ساتھ برتے گئے عدل و انصاف کو اجاگر کیا۔

مولانا آزاد یونیورسٹی حیدرآباد سے پروفیسر علیم اشرف، نے امام علی (علیہ السلام) کو اتحاد اور اولین مسلم کردار کی علامت قرار دیا۔

سکھ مذہب سے تعلق رکھنے والے سماجی کارکن جناب دھرم ویر سنگھ بگا، امبیڈکر نگر (ٹانڈہ)، نے امام علی (علیہ السلام) کو اپنا بہترین آئیڈیل قرار دیا۔

ادبی نشست میں معروف شعرا نایاب بلیاوی اور وسیم امروہوی نے بارگاہ امام علی (علیہ السلام) میں منظوم نذرانہ عقیدت پیش کیا، جس سے تقریب کی رونق میں اضافہ ہوا۔

اختتام پر علی سوسائٹی کے صدر پروفیسر مظہر عباس نے کلمات تشکر پیش کیے اور تمام مہمانوں، شرکاء، منتظمین، اور رضاکاروں کا شکریہ ادا کیا۔

 

مختصر لنک : https://wifaqtimes.com/?p=59988

ٹیگز