ایام عزائے فاطمیہ کی مناسبت سے حرم امام رضاؑ میں اردو زبان زائرین کی جانب سے عزاداری

وفاق ٹائمز کی رپورٹ کے مطابق، ایام عزائے فاطمیہ کے دوران پورے اسلامی جمہوریہ ایران میں جگرگوشہ رسول(ص) حضرت فاطمہ زہرا(س) کی شہادت کا غم وسیع پیمانے پر منایا جاتا ہے اور ہرطرف مجالس و عزاداری کا انعقاد کیا جاتا ہے، اسی مناسبت سے مختلف ممالک سے تعلق رکھنے والے زائرین اپنی عقیدت و محبت کے اظہار کے لئے حضرت امام علی رضا علیہ السلام کے روضہ منورہ پر حاضر ہوتے ہیں، ان زائرین میں کثیر تعداد اردو زبان زائرین کی ہے جو ہر سال ایام عزائے فاطمیہ کے ساتھ ساتھ مختلف مناسبتوں پر حضرت امام علی رضا(ع) کی نورانی و ملکوتی بارگاہ میں زیارت کے لئے حاضر ہو کر اجر رسالت ادا کرتے ہیں۔
ایام عزائے فاطمیہ کی مناسبت سے حضرت امام علی رضا(ع) کےصحن انقلاب میں اردو زبان عزاداروں کی اجتماعی عزاداری کیا انعقاد کیا گیا،جس میں مشہد مقدس میں مقیم اردو زبان سوگواروں اورپاکستان اور ہندوستان سے آنے والے زائرین نے شرکت کی ، اس اجتماعی عزاداری کا اہتمام حرم امام رضا(ع) کی انتظامیہ کی اجازت اور مشہد مقدس میں مقیم ماتمی انجمن محبان الرضا(ع) کے سربراہ عابد حسین جعفری کے تعاون سے کیا گیا ۔
پروگرام کا آغاز صحن انقلاب میں سوز و سلام سے ہوا جس کے بعد پاکستان کے مشہور نوحہ خوان میرحسن میر نے نوحہ خوانی کی ۔اس اجتماعی عزاداری اور ماتم داری میں شرکت کرنے والے عزاداروں کی تعداد چار سو سے زائد تھی۔
قابل ذکر ہے شب جمعہ کو دوبارہ عشرہ فاطمیہ کے سلسلے میں اسی طرح کی اجتماعی عزاداری کا انعقاد کیا جائے گا۔ البتہ اس پروگرام کے علاوہ ہر روزحرم امام رضا(ع) کے رواق دارالرحمہ میں اردو زبان زائرین کے لئے مجلس کا اہتمام کیا جاتا ہے جس کے اختتام پر حرم امام رضا(ع) کی جانب سے زائرین کو تبرک تقسیم کئے جاتے ہیں ۔