دنیائے کفر اور استکباری قوتیں مسلمانوں کے اتحاد سے خائف ہیں، علامہ مقصود ڈومکی

حوزہ ٹائمز کی رپورٹ کے مطابق مجلس وحدت مسلمین پاکستان کے مرکزی ترجمان علامہ مقصود علی ڈومکی نے شکارپور میں سیرت النبی صلی اللہ علیہ وآلہ وسلم کانفرنس سے خطاب کرتے ہوئے کہا ہے کہ حضرت رسول اکرم کی ذات گرامی اللہ رب العزت کی طرف سے عالم انسانیت کے لیے احسان عظیم ہے۔ ہم سیرت مصطفی اپنا کر دنیا و آخرت میں سربلند اور سرفراز ہو سکتے ہیں۔
انہوں نے کہا کہ ربیع الاول کا مہینہ اتحاد بین المسلمین اور اسلامی اخوت کا مہینہ ہے۔ دنیاٸے کفر اور عالمی استکباری قوتیں مسلمانوں کے اتحاد سے خاٸف ہیں۔ سامراجی قوتیں مسلمانوں کے درمیان اختلاف اور انتشار کو ہوا دے رہی ہیں ہمیں اپنے اتحاد اور وحدت سے دشمن کی ان تمام سازشوں کو ناکام بنانا ہوگا۔
انہوں نے کہا کہ اہل سنت ہمارے بھائی ہیں ہفتہ وحدت کی مناسبت سے ١٢ تا ١٧ ربیع الاول اتحاد بین المسلمین کے موضوع پر خصوصی تقریبات منعقد ہوں گی۔ شیعہ سنی مسلمان متحد ہوکر رحمت للعالمین سے اپنے عشق اور محبت کا اظہار کریں گے۔
انہوں نے کہا کہ حضرت امام خمینی رحمۃ اللہ علیہ نے ہفتہ وحدت کے موقع پر اتحاد بین المسلمین کو فروغ دینے کی تاکید کی۔ وطن عزیز پاکستان میں ملی یکجہتی کونسل کے پلیٹ فارم سے اتحاد بین المسلمین کے لٸے دینی جماعتیں مل کر جدوجہد کر رہی ہیں۔
اس موقع پر علامہ نشان حیدر ساجدی علامہ حاجی سیف علی ڈومکی اور مولانا انصاف علی ملاح نے خطاب کیا۔