وفاق ٹائمز، اسلام آبادہائی کورٹ نے پاکستان تحریک انصاف (پی ٹی آئی) کے چیئرمین اور سابق وزیر اعظم عمران خان کے وکیل کو متنبہ کیا ہے کہ اگر عمران خان عدالت پیش نہ ہوئے تو ان کی ضمانت خارج کردی جائے گی۔ چیف جسٹس اسلام آباد ہائیکورٹ جسٹس عامر فاروق نے کہا ہے کہ اگر عدالتی وقت تک عمران خان پیش نہ ہوئے تو عبوری ضمانت خارج کردیں گے۔
عمران خان کی کیسز کی تفصیلات فراہمی اور طلبی کے نوٹس معطلی کی درخواست پر سماعت پر عمران خان کے وکیل خواجہ حارث اسلام آباد ہائیکورٹ میں پیش نہ ہوسکے۔ وکیل نعیم حیدر پنجوتھہ نے کہا کہ کیس کو دیگر کیسز کے ساتھ ڈویژن بینچ میں رکھ لیں۔
چیف جسٹس عامر فاروق نے سوال کیا کہ سنگل بینچ کا کیس ڈویژن بینچ میں کیسے رکھیں؟ کیا یہ کوئی سول کورٹ ہے یا مجسٹریٹ کورٹ، ہم تو سول کورٹس بن کر رہ گئے ہیں۔ کیس کے وقت کا پتہ تھا، وقت پر عمران خان کو یہاں ہونا چاہیے تھا۔
چیف جسٹس عامر فاروق نے استفسار کیا کہ درخواست گزار کہاں ہیں؟ یہ کیسا رویہ ہے، کیا ہمارا لیول نیچے آگیا یا عمران خان اونچے ہوگئے ہیں؟
بعد ازاں اسلام آباد ہائیکورٹ نے خواجہ حارث کی عدم موجودگی کے باعث سماعت میں وقفہ کردیا۔
