4

عقیدہ توحید جتنا خالص ہوگا، اعمال میں اتنا ہی اخلاص پیدا ہوگا، مولانا ضیاء الحسن نجفی

  • News cod : 59924
  • 01 فوریه 2025 - 10:05
عقیدہ توحید جتنا خالص ہوگا، اعمال میں اتنا ہی اخلاص پیدا ہوگا، مولانا ضیاء الحسن نجفی
مولانا ضیاء الحسن نجفی نے کہا ہم ابن تیمیہ کے نظریات کو ماننے والے نہیں ہیں، عقیدہ توحید لینا ہے تو نہج البلاغہ میں کلام امام علی علیہ السلام سے لیں۔اللہ تعالیٰ یکتا ہے اس کا وجود واجبہ ہے ، وہ کسی کی تخلیق کا محتاج نہیں

وفاق ٹائمز، مولانا سید ضیاء الحسن نجفی نے جامع مسجد علی حوزہ علمیہ جامعتہ المنتظر ماڈل ٹاون میں خطبہ جمعہ دیتے ہوئے کہا ہے کہ اسلامی معارف میں سب سے اہم رکن عقیدہ توحید ہے، یعنی اللہ تعالیٰ کو وحدہُ لا شریک ماننا۔

انہوں نے کہا تمام انبیا ءعلیہم السلام کی بعثت کی غرض و غایت اللہ کی وحدانیت کا پیغام لوگوں تک پہنچانا ہے۔ان کا کہنا تھا چاہے نبی ہوں یا امام کسی کی محبت اور نفرت میں حد سے تجاوز نہ کریں۔ یہودی اور مسیحی اپنے انبیاءکے بارے میں تجاوز کرتے تھے ، لیکن افسوس مسلمانوں میں بھی کچھ لوگ آئمہ اور پیروں بارے غلو کرتے ہیں، اس کی اجازت نہیں ، یہ گناہ ہے۔اللہ کسی کا محتاج نہیں، کہا جاتا ہے کہ فلاں نہ ہوتے تو اللہ کا فلاں کام نہ ہوسکتا تھا۔ دین میں غلو ہے۔ اللہ سارے گناہ بخش سکتا ہے مگر شرک کو معاف نہیں کیا جائے گا۔ اللہ کے ساتھ کہنا کہ فلاں نے مشورہ دیا فلاں کو اولاد دے دیں یا یہ کہنا کہ اللہ تعالیٰ نے کہا اولاد نہیں مگر فلاں شخصیت نے کہا اس کی اولاد ہو گی، تو یہ شرک ہے۔ جس کی کوئی معافی نہیں۔اللہ کو کسی کے مشورے یا مدد کی ضرورت نہیں۔

مولانا ضیاء الحسن نجفی نے کہا ہم ابن تیمیہ کے نظریات کو ماننے والے نہیں ہیں، عقیدہ توحید لینا ہے تو نہج البلاغہ میں کلام امام علی علیہ السلام سے لیں۔اللہ تعالیٰ یکتا ہے اس کا وجود واجبہ ہے ، وہ کسی کی تخلیق کا محتاج نہیں، حضرت آدم علیہ السلام سے لے کر خاتم النبیین حضرت محمد مصطفی صلی اللہ علیہ وآلہ وسلم تک سب اپنے وجود کی تخلیق میں اللہ کے محتاج ہیں۔

انہوں نے کہا کائنات کا مدبر اللہ ہے، دریاوں کی روانی انسانوں کی پیدائش اللہ کا اختیار ہے، کسی امام کے بارے کہنا کہ نظام اپنی انگلی سے چلاتے ہیں درست نہیں ہے۔ عقیدہ توحید جتنا خالص ہو گا ، اعمال میں اتنا ہی اخلاص پیدا ہو گا۔

مختصر لنک : https://wifaqtimes.com/?p=59924

ٹیگز