وفاق المدارس الشیعہ پاکستان کے صدر آیت اللہ حافظ سید ریاض حسین نجفی نے جامع علی مسجد، حوزہ علمیہ جامعۃ المنتظر ماڈل ٹاؤن میں خطبۂ جمعہ دیتے ہوئے کہا ہے کہ اجتماعیت انسان کی طاقت اور قوت کا بنیادی ذریعہ ہے، اور نمازِ جمعہ اس کی بہترین عملی مثال ہے۔
انہوں نے اپنے خطبے میں کہا کہ اسلام نے ہمیشہ وحدت اور اتحاد پر زور دیا ہے۔ ابتدائی دور میں مسلمان ایک جسم کی مانند متحد تھے اور ان پر ایک ہی قیادت موجود تھی، جس کی وجہ سے وہ دور اسلام کا سنہری دور قرار دیا جاتا ہے۔
انہوں نے رہبرِ انقلابِ اسلامی آیت اللہ سید علی خامنہ ای کا ذکر کرتے ہوئے کہا کہ وہ صرف ایران کے رہبر نہیں تھے، بلکہ ہر اس شخص کے رہبر تھے جو ان کی عظمت کا قائل تھا، حتیٰ کہ اگر کوئی شخص بظاہر مسلمان نہ بھی ہو لیکن ان کی قیادت کو تسلیم کرتا ہو تو وہ بھی ان کے فکری دائرۂ اثر میں شامل ہے۔
آیت اللہ حافظ سید ریاض حسین نجفی نے کہا کہ الحمدللہ آج 90 فیصد سے زائد مسلمان وحدت کے ساتھ جڑے ہوئے ہیں، جو ایک مثبت اور قابلِ فخر پیش رفت ہے۔
انہوں نے مزید کہا کہ جنگ کے بھی کچھ اصول ہوتے ہیں، اور قرآنِ کریم اور اہلِ بیتؑ کی تعلیمات کی روشنی میں یہ واضح ہے کہ اگر کوئی فریق صلح کی پیشکش کرے تو صلح کو قبول کرنا چاہیے۔
انہوں نے کہا کہ یہ صدی مسلمانوں کی بیداری اور کامیابی کی صدی ہے۔ ایران نے اپنی ثابت قدمی اور حکمت کے ذریعے فتح حاصل کی ہے، اور آج کوئی یہ نہیں کہتا کہ ایران شکست سے دوچار ہوا ہے۔
