وفاق ٹائمز، قائد ملت جعفریہ پاکستان علامہ سید ساجد علی نقوی نے ہولوکاسٹ کے متاثرین کی یادداشت کے عالمی دن پر جاری اپنے پیغام میں کہا: نازیوں کا رویہ غیر انسانی تھا تو سامراجیوں اور صہیونیوں کا رویہ ان سے بھی زیادہ وحشیانہ اور درندگانہ ہے، ہولوکاسٹ پر اعتراضات کے باوجود انتہائی قبیح فعل مگر جو کچھ ناجائز وقابض صہیونی درندوں نے کیا وہ انتہائی ظلم ،بہمیت کے زمرے میں نہیں آتا؟
انہوں نے کہا: ہولوکاسٹ کے تذکرے تو صرف دستاویزی شکل میں خال خال مگر غزہ، بیت المقدس، مغربی کنارہ، خان یونس، شام اور لبنان میں ہونیوالی بربادی و تباہ کاری دنیا نے اپنی نظروں سے دیکھی دنیا اس کی گواہ ہے۔
علامہ سید ساجد علی نقوی نے کہا: اولین اصول ہے کہ ظلم جہاں پر بھی ہو وہ ظلم ہی ہے۔ تاریخ میں نازیوں کا رویہ جو بیان کیا گیا وہ غیر انسانی تھا مگر ہولوکاسٹ کی بنیاد پر بھی سوالات و اعتراضات اٹھے، بعض حوالوں سے ہولوکاسٹ کو سراسر جھوٹ اور پروپیگنڈہ بھی قرار دیا گیا مگر اس کے باوجود اس وقت سے نہ ان اقدامات کی مذمت ہوئی بلکہ آج تک عالمی سطح پر اس معاملے پر منفی تذکرے تک پر پابندیاں ہیں تو دوسری طرف جو کچھ سامراجیت و صہیونیت نے کیا، جو قیامت غزہ، مغربی کنارے، خان یونس، بیت المقدس کے ساتھ پڑوسی ممالک لبنان و شام پر ڈھائی گئی جو حیوانیت و درندگی ظاہر ہوئی، اس کی مثال تاریخ انسانی میں نہیں ملتی۔
انہوں نے مزید کہا: ہولوکاسٹ تاریخ کا ایک ایسا تذکرہ ہے جس پر اعتراضات موجود مگر ارض فلسطین پر جو ظلم ڈھائے گئے وہ سب کچھ عالمی دنیا کی نظروں کے سامنے ہوا، ہولوکاسٹ بارے تاریخی شواہد مٹائے گئے یا خفیہ آپریشن ہوئے مگر غزہ سے بیروت اور بیت المقدس سے دمشق تک سارے مظالم دن کی روشنی کے سامنے ہوئے، بچوں، خواتین اور بزرگ شہریوں کی لاشوں کے ساتھ بھوک و پیاس اور بے یارو مددگار بے سائباں انسان اور ہرطرف پھیلی تباہی، بربادی اور کھنڈرات سامراجی و صہیونی مظالم کی واضح مثال اور کبھی نہ مٹنے والے ثبوت ہیں جنہیں ہزار ہا پروپیگنڈوں کے باوجود کبھی دلوں سے ختم نہ کیا جاسکے گا کیونکہ غزہ مظالم پر جس طرح عالمی سطح پر انسانیت نے آواز بلند کی وہ بھی اپنی مثال آپ ہے مگر وہ وقت دور نہیں جب دنیا سے ہر قسم کے ظلم کا خاتمہ ہو گا اور ہر ظالم کو حساب دینا پڑے گا۔
